भरती परीक्षा सुधारणांवर उच्चस्तरीय समितीशी संवाद विद्यार्थी, उमेदवार व संबंधित घटकांनी उपस्थित राहावे – विभागीय आयुक्त रुबल अग्रवाल*
नवी मुंबई, प्रतिनिधी: राज्यातील भरती परीक्षा पद्धतीत आवश्यक सुधारणा करण्यासाठी गठित राज्य भरती परीक्षा सुधारणा उच्चस्तरीय समिती कोकण विभागातील विद्यार्थी, स्पर्धा परीक्षा उमेदवार आणि संबंधित घटकांशी प्रत्यक्ष संवाद साधणार आहे. मंगळवार, दि. २९ सप्टेंबर २०२६ रोजी सकाळी ११ वाजता चेतना कॉलेज, जिल्हाधिकारी, मुंबई उपनगर यांच्या कार्यालयाजवळ, चेतना महाविद्यालय मार्ग, वांद्रे (पूर्व), मुंबई-५१ येथे हा संवाद आयोजित करण्यात आला असल्याची माहिती विभागीय आयुक्त रुबल अग्रवाल यांनी दिली आहे.
भरती परीक्षा पद्धतीतील सुधारणा अधिक प्रभावी, पारदर्शक आणि उमेदवारांच्या अनुभवांवर आधारित करण्याच्या दृष्टीने या सल्लामसलतीचे आयोजन करण्यात आले आहे. यावेळी विद्यार्थी व स्पर्धा परीक्षा परीक्षार्थी, शैक्षणिक संस्था, परीक्षा प्रक्रियेशी संबंधित यंत्रणा, विषयतज्ज्ञ तसेच अन्य संबंधित घटकांना भरती परीक्षा प्रक्रियेतील आपले अनुभव, अडचणी, अपेक्षा आणि सुधारणा संबंधी सूचना प्रत्यक्ष समितीसमोर मांडण्याची संधी उपलब्ध होणार आहे.
भरती परीक्षांशी संबंधित प्रत्यक्ष अनुभव असलेल्या विद्यार्थी, उमेदवार तसेच संबंधित घटकांचा सहभाग या संवाद प्रक्रियेस महत्त्वाचा असल्याने, ज्यांना परीक्षा पद्धतीबाबत आपल्या सूचना व अनुभव मांडायचे आहेत त्यांनी या संवादात सहभागी व्हावे, असे आवाहन श्रीमती अग्रवाल यांनी केले आहे.
