लातूर जिल्ह्यातील तीनही नगरपरिषदांसाठी शांततेत मतदान,उदगीर नगरपरिषद निवडणुकीत 68.12 टक्के, अहमदपूरमध्ये 73.06 आणि औसा नगरपरिषदमध्ये 75.73 टक्के मतदान…

लातूर प्रतिनिधी-जिल्ह्यातील तीन नगरपरिषदांमध्ये आज (ता. 02) सकाळी साडेसात ते सायंकाळी साडेपाच वाजेपर्यंत मतदान झाले. सर्वच मतदान केंद्रावर शांततापूर्ण वातावरणात मतदान प्रक्रिया पूर्ण झाली. यामध्ये उदगीरमध्ये 68.12 टक्के, अहमदपूरमध्ये 73.06 आणि औसामध्ये 75.73 टक्के मतदारांनी आपला हक्क बजाविला.

उदगीर नगरपरिषदेसाठी 91 मतदान केंद्रांवर मतदान घेण्यात आले. यामध्ये एकूण 83 हजार 179 मतदारांपैकी 29 हजार 423 पुरुष, 27 हजार 231 महिला व 9 इतर मतदार असे एकूण 56 हजार 663 मतदारांनी मतदान केले.

अहमदपूर येथे सर्व 44 मतदान केंद्रांवर मतदान प्रक्रिया शांततेत पार पडली. शहरातील 37 हजार 696 मतदारांपैकी 27 हजार 540 मतदारांनी आपला मतदानाचा हक्क बजाविला. यामध्ये 14 हजार 242 पुरुष आणि 13 हजार 298 महिला मतदारांचा समावेश आहे.

औसा नगरपरिषद सार्वत्रिक निवडणुकीसाठी 36 मतदान केंद्रांवर एकूण 75.73 टक्के मतदान झाले. 32 हजार 320 एकूण मतदारांपैकी 24 हजार 476 मतदारांनी मतदान केले. यामध्ये 12 हजार 870 पुरुष आणि 11 हजार 606 महिला मतदारांचा समावेश आहे.

*****