योजनेसाठी जमीन खऱेदी करणार : समाजकल्याण कार्यालय जमीनविक्रीस इच्छूकांनी प्रस्ताव देण्याचे आवाहन
अकोला, प्रतिनिधी- कर्मवीर दादासाहेब गायकवाड सबळीकरण व स्वाभिमान योजनेसाठी समाजकल्याण कार्यालयाकडून जिल्ह्यात शेतजमीन खरेदी करण्यात येणार असून, इच्छूक शेतमालकांनी प्रस्ताव देण्याचे आवाहन जिल्हा समाजकल्याण सहायक आयुक्त मारोती वाठ यांनी केले आहे.
सन 2025-26 या आर्थिक वर्षाकरीता ज्यांना आपल्या वैयक्तिक मालकीची शेतजमीन या योजनेअंतर्गत विक्री करावयाची आहे, अशा शेतमालकांनी जमीन विक्रीसंबंधी प्रस्ताव समाजकल्याण कार्यालयात सादर करावे. ई-क्लास, गावठाण जमीन, शासकीय जमिनीकरिता ही योजना लागु नाही.
शेतजमिनीवर कोणताही बोजा नसावा. याबाबत अद्ययावत 7/12 व आज रोजीच्या मुल्यांकनासह प्रथम कार्यालयात संपर्क साधावा व विहीत नमुन्यातील अर्ज कार्यालयातुन घेऊन जावा. त्यानंतर आवश्यक सर्व कागदपत्रे जोडून जमिन विक्रीचा प्रस्ताव सादर करावा. जमिन विक्रीच्या दरास जिल्हास्तरीय समितीमार्फत मंजुरी देण्यात येईल व जमिनीचे दर निश्चित होतील, असे श्री. वाठ यांनी सांगितले.
०००
