अपर मुख्य सचिव (महसूल) विकास खारगे यांनी अलिबाग तालुक्यातील विविध ठिकाणी भेटी देवून केली पाहणी
रायगड-अलिबाग, प्रतिनिधी:- ग्रामीण भागातील विद्यार्थ्यांच्या सर्वांगीण जडणघडणीसाठी जिल्हा परिषद प्राथमिक शाळा महत्त्वाची भूमिका बजावतात. शिक्षणासोबतच मुलांच्या संस्कार आणि मूल्यवर्धनासाठी जिल्हा परिषद शाळांमध्ये विविध उपक्रम राबवले जातात. या उपक्रमांना चालना देण्यासाठी जिल्ह्यातील सर्व विभागातील कार्यरत अधिकारी वर्षातून किमान दोनदा शाळांना भेट देऊन “प्रेरणा दिवस” साजरा करणार आहेत.
या पार्श्वभूमीवर राज्याचे अपर मुख्य सचिव (महसूल) विकास खारगे यांनी जिल्हाधिकारी किशन जावळे यांच्या सोबत आज अलिबाग तालुक्यातील पी. एम. श्री. रा. जि. प. शाळा, नवगाव येथे पालक, शिक्षक व विद्यार्थी यांच्याशी सुसंवाद साधून शैक्षणिक व सामाजिक प्रगतीसाठी मार्गदर्शन केले. बोरिस व गुंजीस येथील पाणंद रस्त्यांची पाहणी केली. तसेच ग्रामपंचायत गुंजीस येथे आयुष्यमान भारत कार्डचे वाटप करण्यात आले. नवगाव आरोग्य केंद्र, जिल्हा परिषद शाळा तसेच तहसील कार्यालय, अलिबाग कार्यालयाची पाहणी केली.
यावेळी जिल्हा अधीक्षक भूमी अभिलेख सुनिल इंदलकर, उपविभागीय अधिकारी मुकेश चव्हाण, तहसीलदार विक्रम पाटील, तसेच मुख्याध्यापक व शिक्षक उपस्थित होते.
०००००००
