महाराष्ट्र वैद्यकीय परिषद निवडणुकीसाठी मतदान करण्याचे आवाहन
सांगली, प्रतिनिधी : महाराष्ट्र वैद्यकीय परिषद निवडणूक 2025 कार्यक्रम जाहीर करण्यात आला आहे. या निवडणूक कार्यक्रमांतर्गत दिनांक 3 एप्रिल 2025 रोजी सकाळी 8 ते सायंकाळी 5 वाजेपर्यंत मतदान होणार आहे. सर्व मतदारांनी सर्व नियमांचे पालन करून आपल्या मतदानाचा हक्क बजावावा, असे आवाहन जिल्हाधिकारी अशोक काकडे यांनी प्रसिध्दीपत्रकाव्दारे केले आहे.
मतदानासाठी पद्मभूषण वसंतदादा पाटील शासकीय रुग्णालय, परिचर्या शिक्षण महाविद्यालय सांगली दक्षिणाभिमुखी इमारतीमध्ये एकूण 4 मतदान केंद्रे निश्चित करण्यात आली आहेत. या मतदान केंद्रांवर एकूण 2 हजार 491 इतक्या मतदारांसाठी पुढीलप्रमाणे मतदान व्यवस्था करण्यात आल्याची माहिती उपजिल्हाधिकारी (महसूल) राजीव शिंदे यांनी दिली.
मतदान केंद्र क्र. १ – मतदार यादी अनुक्रमांक ००१ ते ६००, मतदान केंद्र क्र. २ – मतदार यादी अनुक्रमांक ६०१ ते १२००, मतदान केंद्र क्र. ३ – मतदार यादी अनुक्रमांक १२०१ ते १८००, मतदान केंद्र क्र. ४- मतदार यादी अनुक्रमांक १८०१ ते २४९१.
या निवडणूक प्रक्रीयेअंतर्गत, नोंदणीकृत MBBS डॉक्टर हे मतदार आहेत. निवडणुकीसाठी महाराष्ट्रातून एकूण ४१ उमेदवार निवडणूक लढवीत आहेत. या उमेदवारांपैकी ९ उमेदवार निवडून देण्याचे असल्याने प्रत्येक मतदार ९ मते देवून आपला मतदानाचा हक्क बजावेल. या मतदानासाठी मतदारांनी महाराष्ट्र वैद्यकीय परिषदेचे सदस्य ओळखपत्र किंवा लोकसभा विधानसभा नुसार अनिवार्य असणारे ओळखपत्र मतदानासाठी घेवून येण्याचे आहे.
पदमभूषण वसंतदादा पाटील शासकीय रुग्णालय, परिचर्या शिक्षण महाविद्यालय सांगली दक्षिणाभिमुखी इमारत परिसरामध्ये दिनांक ०२ व ०३ एप्रिल रोजी भारतीय नागरिक सुरक्षा संहिता २०२३ चे कलम १६३ नुसार बंदी आदेश लागू करण्यात आला आहे. या निवडणुकीसाठी परिवेक्षीय अधिकारी म्हणून उपजिल्हाधिकारी (महसूल) राजीव शिंदे (७५८८८२२५००), तसेच डॉ. तुषार बनसोडे (७७५८०५१९५२) यांची समन्वय अधिकारी म्हणून नेमणूक करण्यात आली असल्याचे प्रसिध्दी पत्रकात म्हटले आहे.
0000000
