धारावीत ज्येष्ठ नागरिकांसाठी छळवाद प्रतिबंध माहिती सत्र संपन्न*
मुंबई प्रतिनिधी*धारावी,:* जागतिक ज्येष्ठ नागरिक छळवाद जनजागृती दिनाच्या पार्श्वभूमीवर धारावी येथील एल. टी. नगरमधील एकविरा मित्र मंडळात आज ज्येष्ठ नागरिकांसाठी विशेष माहिती सत्र पार पडले. ज्येष्ठ नागरिक झेंडा ग्रुप व फेस्कॉम मुंबई विभाग यांच्या संयुक्त विद्यमाने सकाळी 11 ते दुपारी 2 या वेळेत हा उपक्रम राबवण्यात आला.
फेस्कॉमचे माजी अध्यक्ष शरद डिचोलकर यांनी 2007 च्या ‘आई-वडील व ज्येष्ठ नागरिकांचा निर्वाह व कल्याण कायदा’ व शासकीय योजनांबाबत मार्गदर्शन केले. धारावी पोलीस ठाण्याचे निरीक्षक वामन ठाकरे व उपनिरीक्षिका गाढवे यांनी ज्येष्ठांच्या संरक्षणासाठी कायदेशीर माहिती दिली. समाजसेवक महादेव शिंदे यांनी कुटुंबातील संवादाचे महत्त्व विशद केले.
कार्यक्रमाची सुरुवात साने गुरुजींच्या प्रार्थनेने झाली. यावेळी शिंदे परिवारातर्फे सर्व ज्येष्ठांना पावसाळी छत्र्यांचे वाटप करण्यात आले. मान्यवरांचा शाल, श्रीफळ व पुष्पगुच्छ देऊन सन्मान झाला.
संपर्क सचिव दिलीप गाडेकर, अध्यक्ष फेस्कॉम मुंबई विभाग सुरेश ईश्वर पोटे यांच्या मार्गदर्शनाखाली झालेल्या या सत्रास मोठ्या संख्येने ज्येष्ठ नागरिक उपस्थित होते. सूत्रसंचालन दिलीप गाडेकर यांनी तर आभार परशुराम जाधव यांनी मानले. ज्येष्ठांवरील अन्याय रोखण्यासाठी कायद्याची जनजागृती हाच मुख्य उद्देश असल्याचे आयोजकांनी सांगितले.
