दिव्यांग उमेदवारांसाठी विशेष करिअर मार्गदर्शन शिबीराचे आयोजन

जालना, प्रतिनिधी:- जिल्ह्यातील नोकरीच्या शोधात असलेल्या दिव्यांग युवक-युवतींसाठी जिल्हा कौशल्य विकास, रोजगार व उद्योजकता मार्गदर्शन केंद्र आणि भारत सरकारच्या श्रम व रोजगार मंत्रालयांतर्गत असलेल्या ‘नॅशनल करिअर सर्विस सेंटर’ (मुंबई) यांच्या संयुक्त विद्यमाने शुक्रवार दि. 6 मार्च 2026 रोजी विशेष पुनर्वसन व करिअर मार्गदर्शन शिबिराचे आयोजन करण्यात आले आहे. तरी शिवाजी पुतळा परिसरातील गुरुगणेश सभा मंडप, श्रावक संघ तपोधाम येथे हे शिबिर पार पडणार असून जास्तीत जास्त दिव्यांगांनी या संधीचा लाभ घ्यावा, असे आवाहन प्रशासनातर्फे करण्यात आले आहे.

या शिबिरात सहभागी होणाऱ्या उमेदवारांना केवळ मार्गदर्शनच मिळणार नाही, तर प्रत्यक्ष रोजगाराच्या संधींशी जोडले जाण्यासाठी मदत केली जाणार आहे. उमेदवारांच्या क्षमतेनुसार त्यांना कोणत्या क्षेत्रात करिअर करता येईल, याचे मार्गदर्शन तज्ज्ञांमार्फत केले जाईल. ‘RPWD Act 2016’ नुसार पात्र दिव्यांगांना केंद्रातर्फे ओळखपत्र दिले जाईल. तसेच भारत सरकारच्या ‘नॅशनल करिअर सर्विस’ पोर्टलवर नोंदणी करून दिली जाईल. विविध खासगी कंपन्या आणि उद्योगांमधील संधींची माहिती उपलब्ध करून देण्यात येईल. अधिक माहितीसाठी मॉडेल करिअर सेंटर, जालनाचे समन्वयक डॉ. अमोल परिहार (९८२२८५८५७४) यांच्याशी कार्यालयीन वेळेत संपर्क साधावा, असे आवाहन सहायक आयुक्त, जिल्हा कौशल्य विकास रोजगार व उद्योजकता विभाग, जालना यांनी प्रसिध्दीपत्रकाद्वारे केले आहे.

-*-*-*-*-