गुणवत्तापूर्ण सुविधा पूर्ततेप्रमाणेच त्यासाठी कार्यरत कर्मचारीहिताय निर्णयावर आयुक्त डॉ.कैलास शिंदे यांचा भर दीड वर्षात 937 अधिकारी-कर्मचारी यांना पदोन्नती, आश्वासित प्रगती, अनुकंपा, लाड-पागे वारसा हक्क लाभ,प्रलंबित प्रश्न मार्गी लागल्याने नवी मुंबई महानगरपालिका अधिकारी-कर्मचारी यांचेमध्ये समाधानाचे वातावरण

 

      नवी मुंबई प्रतिनिधी-    नवी मुंबई महानगरपालिकेने राष्ट्रीय, आंतरराष्ट्रीय पातळीवर विविध पुरस्कार व सन्मान प्राप्त केले असून दर्जेदार नागरी सेवा सुविधा पूर्ततेवर भर देत असतानाच लोकाभिमुख प्रशासन राबविण्यासाठी महानगरपालिकेशी संबंधित विविध लोकसेवा ऑनलाईन उपलब्ध करुन देण्यावर महापालिका आयुक्त डॉ.कैलास शिंदे यांचे विशेष लक्ष आहे. या कार्यवाहीत महानगरपालिका अधिकारी व कर्मचारी यांनी केलेल्या कामाचा महत्वाचा वाटा आहे.

           त्या अनुषंगाने आयुक्त डॉ.कैलास शिंदे यांनी अधिकारी, कर्मचारी हिताच्या प्रशासकीय बाबींकडे विशेष लक्ष दिले आहे. याकरिता अतिरिक्त आयुक्त श्री.सुनिल पवार यांच्या अध्यक्षतेखाली प्रशासकीय बाबींकरीता विशेष समिती गठीत करण्यात आली असून प्रशासन विभागाचे उपआयुक्त सदस्य सचिव असलेल्या या समितीमार्फत केल्या जाणाऱ्या कार्यवाहीचा नियमीत आढावा घेतला जात आहे. यामुळे अधिकारी-कर्मचारीवृंदाचे अनेक वर्षे प्रलंबित असलेले पदोन्नती, आश्वासित प्रगती योजना असे विषय मार्गी लागले आहेत.

   यामध्ये मार्च 2024 ते नोव्हेंबर 2025 या पावणे दोन वर्षांच्या कालावधीत 378 अधिकारी, कर्मचारी यांना पदोन्नती देण्यात आली असून याव्दारे बरीच वर्षे प्रलंबित असलेल्या पदोन्नती विषयाला गती मिळाली आहे. या मोठया प्रमाणात झालेल्या पदोन्नतीमुळे वरिष्ठ पदावर काम करण्याची संधी पात्रता असणाऱ्या कर्मचाऱ्यांना मिळाली असून त्यांना पदोन्नती मिळाल्याने कनिष्ठ कर्मचाऱ्यांचाही पुढील प्रगतीचा मार्ग खुला झाला आहे. पदोन्नतीत गट ‘अ’ मधील 42, गट ‘ब’ मधील 122, गट ‘क’ मधील 214 अशा एकूण 378 अधिकारी, कर्मचारी यांना पदोन्नतीचा लाभ मिळाला आहे.

  त्याचप्रमाणे मार्च 2024 ते नोव्हेंबर 2025 या कालावधीत 515 इतक्या मोठया संख्येने अधिकारी, कर्मचारी यांना आश्वासित प्रगती योजनेचा लाभ देण्यात आलेला आहे. यामध्ये गट ‘अ’ मधील 48, गट ‘ब’ मधील 7, गट ‘क’ मधील 389 आणि गट ‘ड’ मधील 71 अशा एकूण 515 अधिकारी, कर्मचारी यांना पहिल्या, दुसऱ्या, तिसऱ्या आश्वासित प्रगती योजनेचा लाभ अनुज्ञेय करण्यात आलेला आहे. यामुळे पदोन्नती पासून वंचित राहिलेल्या अधिकारी, कर्मचारीवृंदाला दिलासा मिळाला आहे.

  नवी मुंबई महानगरपालिकेच्या आस्थापनेवर गट ‘अ’ ते गट ‘ड’ या संवर्गात शिक्षक वगळता एकूण 4124 पदांच्या विभागनिहाय आकृतीबंधाला शासनामार्फत मंजूरी मिळालेली असून त्यापैकी 2266 पदे भरलेली आहेत. महानगरपालिकेच्या सर्व संवर्गाचे सेवाप्रवेश नियमही मंजूर आहेत. महानगरपालिकेच्या कामकाजात भासणारी अधिकारी, कर्मचारी यांची गरज लक्षात घेऊन सरळसेवा पदभरती काढण्यात आली असून गट ‘क’ व गट ‘ड’ संवर्गाच्या 668 पदांची पदभरती अंतिम टप्प्यात आहे. यामुळे नवी मुंबई महानगरपालिकेच्या कामाला अधिक गती मिळणार आहे.

           प्रशासनाच्या कार्यालयीन रुक्ष कामकाजातही संवेदनशीलता जपत मार्च 2024 ते नोव्हेंबर 2025 या कालावधीत अनुकंपा तत्वावर 33 उमेदवारांना महानगरपा‍लिका सेवेत नियुक्ती देण्यात आली आहे. त्यामध्ये शैक्षणिक पात्रतेनुसार गट क संवर्गात लिपीक-टंकलेखक, वायरमन, कनिष्ठ अभियंता अशा पदांवर 9 उमेदवारांना, शिपाई, कक्षसेवक अशा पदांवर 24 उमेदवारांना नियुक्ती देण्यात आली आहे. तसेच शासनाच्या धोरणानुसार शिपाई / सफाई कामगार पदावर 3 बारवी प्रकल्पग्रस्त उमेदवारांना नियुक्ती देण्यात आलेली आहे.

           त्याचप्रमाणे लाड-पागे समितीच्या वारसा हक्क शिफारसीनुसार गट क संवर्गात एका उमेदवारास रोखपाल पदावर व गट ड संवर्गात 11 उमेदवारांना सफाई कामगार पदावर नियुक्ती देण्यात आलेली आहे.

           याशिवाय 150 दिवसाच्या कृती कार्यक्रमांतर्गत सरळसेवेच्या कोटयातील गट ‘अ’ ते गट ‘ड’ या संवर्गाच्या सर्व बिंदू नामावली नोंदवहया तपासणीसाठी शासनास व सहाय्यक आयुक्त, मागासवर्ग कक्ष यांना सादर करण्यात आलेल्या आहेत.

     कामकाजात अधिक सुनियोजितता आणण्यासाठी सुशासनाच्या दृष्टीकोनातून भांडवली गुंतवणूकीसाठी राज्यांना विशेष सहाय्य योजना 2025 या अंतर्गत अभियांत्रिकी व तांत्रिक संवर्गांची सुधारित संरचना, आकृतीबंध व आवश्यक सेवा अर्हता याबाबतचा प्रस्ताव शासनाकडे सादर करण्यात आला आहे. त्यामध्ये कार्यवाही सुधारणेच्या दृष्टीने नवीन कक्ष निर्माणाचे प्रस्तावित करण्यात आलेले आहे. या कक्षांमध्ये पाणीपुरवठा व मोरबे मुख्यालय कक्ष, दक्षता व गुणवत्ता नियंत्रण कक्ष, माहिती व तंत्रज्ञान कक्ष, आर्थिक नियोजन कक्ष, जीआयएस कक्ष, वाहतूक नियोजन कक्ष सुरु करण्याचे नियोजन करण्यात आलेले आहे.

          नवी मुंबई महानगरपालिकेची कृतीशील व लोकाभिमुख प्रतिमा उंचावण्यासाठी कार्यरत असणाऱ्या अधिकारी, कर्मचारी यांच्या कार्यालयीन कामकाजविषयक बाबींकडेही महापालिका आयुक्त डॉ.कैलास शिंदे यांचे विशेष लक्ष असून त्यानुसार कर्मचारीहिताय निर्णयांना प्राधान्य दिले जात असल्याबद्दल व अनेक वर्षांपासून प्रलंबित असलेले विषय मार्गी लागल्याबद्दल अधिकारी, कर्मचारीवृंदाकडून समाधान व्यक्त करण्यात येत आहे

00000