मातृतीर्थ सिंदखेड राजात जिजाऊभक्तांचा जनसागर !राष्ट्रमाता जिजाऊंचा ४२८ वा जन्मोत्सव थाटात साजरा
राज्य प्रतिनिधी-राष्ट्रमाता जिजाऊ माँसाहेब यांचा ४२८ वा जन्मोत्सव सोहळा सोमवारी मोठ्या थाटात साजरा करण्यात आला. यानिमित्ताने जिजाऊंचे जन्मस्थान असलेल्या मातृतीर्थ सिंदखेडराजा नगरीत दर्शनासाठी सकाळपासून जनसागर लोटला होता. सकाळी ६ वाजता राजे लखुजीराव जाधव राजवाड्यातील राजमाता जिजाऊंच्या जन्मस्थानी वंशज राजे विजयसिंह जाधव, शिवाजीराव जाधव यांच्या हस्ते महापूजा करण्यात आली. तसेच केंद्रीय आयुष, आरोग्य व कुटुंब कल्याण राज्यमंत्री ना.प्रतापराव जाधव यांनी सपत्नीक राजमाता माँ जिजाऊ यांची महापूजा करुन अभिवादन केले.
यावेळी आमदार मनोज कायंदे, माजी मंत्री डॅा. राजेंद्र शिंगणे, माजी शशिकांत खेडेकर, नगराध्यक्ष सौरभ तायडे यांनीही राजमाता जिजाऊ माँसाहेब यांना पुष्पहार अर्पण करुन अभिवादन केले.
सिंदखेडराजा विकास आराखडा पूर्ण करण्यासाठी प्रयत्नशील – केंद्रीय राज्यमंत्री ना. प्रतापराव जाधव
राष्ट्रमाता माँ जिजाऊ साहेबांना अभिवादन करुन केंद्रीय आरोग्य राज्यमंत्री प्रतापराव जाधव यांनी प्रसारमाध्यमांशी बोलतांना सांगितले की, आज राष्ट्रमाता जिजाऊ यांचा ४२८ वा जन्मदिवस आहे. त्यानिमित्त देशभरातून जिजाऊभक्त, शिवप्रेमी जिजाऊ यांच्या जन्मस्थानी येतात. हे मातृतिर्थ सिंदखेड राजा भूमीचे वैभव आहे. या जन्मोत्सवाचा जनमानसात प्रचंड उत्साह दिसून येत आहे. त्यांच्या दर्शनाने अनेकांना नवी प्रेरणा मिळते. राज्य शासनाने सिंदखेड राजा विकास आराखडा जाहीर केला आहे. यातील कामे वेगवेगळ्या विभांगांकडे दिलेली आहेत. या ठिकाणच्या बऱ्याच वास्तू पुरातत्व विभागाच्या अधिपत्याखाली येतात. दरवर्षी या आराखड्यातील नवीन कामे पूर्ण झालेले दिसून येते. पुरातत्व विभागाचे काम अत्यंत बारकाईने केले जात असल्यामुळे कामे पूर्ण व्हायला उशीर लागत असल्याचे स्पष्ट करत त्यांनी केंद्र व राज्य शासनाच्या माध्यमातून सिंदखेड राजा विकास आराखडा लवकरात लवकर पूर्ण करुन घेण्यासाठी प्रयत्नशील असल्याचे यावेळी सांगितले.
00000
