पाणी परवाना, विद्युत उपसा यंत्र परवाने-31 जानेवारीपर्यंत नूतनीकरण करून घ्यावेत..

 

– सांगली, प्रतिनिधी: परवाना मुदत संपलेल्या लाभधारकांनी, सहकारी संस्थांनी आपले पाणी परवाने व विद्युत उपसा यंत्र परवाने दि. 31 जानेवारी 2025 अखेर आवश्यक कागदपत्रे सादर करून नूतनीकरण करून घ्यावेत. अन्यथा, असे पाणी परवाने व विद्युत उपसा यंत्र परवाने आपणास आवश्यकता नाही असे समजून शासन निर्णयातील तरतुदीनुसार आपोआप रद्द होतील. याबाबत स्वतंत्र कळविले जाणार नाही याची संबंधितांनी नोंद घ्यावी, असे सांगली पाटबंधारे विभागाच्या कार्यकारी अभियंता ज्योती देवकर यांनी प्रसिध्दी पत्रकाव्दारे कळविले आहे.

  ज्या बागायतदारांचे, ग्राहकांचे पाणी परवाने व विद्युत उपसा यंत्र परवाने मे 2024 अखेर कार्यान्वित झालेले नाहीत, असे पाणी परवाने व विद्युत उपसा यंत्र परवाने दिनांक 21 नोव्हेंबर 2002 च्या शासन निर्णयामधील तरतुदीसार रद्द करण्यात येणार आहेत. याची सांगली पाटबंधारे विभागांतर्गत कृष्णा नदी, मध्यम प्रकल्प व ल. पा. तलावांवर 31 मे 2022 या दिनांकापूर्वी पाणी परवाना व विद्युत उपसा यंत्र परवाना मंजूरी घेणाऱ्या सांगली जिल्ह्यातील मिरज, वाळवा, शिराळा, पलूस, तासगांव व जत तालुक्यातील, सातारा जिल्ह्यातील कराड तालुक्यातील व कोल्हापूर जिल्ह्यातील शिरोळ तालुक्यातील सर्व लाभधारक / बागायतदार / सहकारी पाणी पुरवठा संस्था यांनी नोंद घ्यावी.

  ज्या सहकारी पाणी पुरवठा संस्था यांनी दि. 1 जुलै 2023 ते 30 जून 2029 या कालावधीचा पाणी परवाना पुनर्विलोकन करून क्षेत्र निश्चितीसह करारनामा करून घेतले नाहीत त्या सहकारी संस्थांनी त्वरित आपले संस्थेचे क्षेत्र निश्चित करून करारनामे करून घ्यावेत. अन्यथा ज्या संस्थांनी दि. 1 जुलै 2023 ते 30 जून 2029 या कालावधीत ज्या लाभधारक सभासदांचे न. नं. 7 चे अर्ज भरून दिले आहेत, त्या गट क्रमांकाचे क्षेत्र निश्चित केले जाईल व आपणास उर्वरीत क्षेत्राची आवश्यकता नाही, असे समजून आपला उर्वरीत क्षेत्राचा परवाना आपोआप रद्द होईल. याबाबत कोणाची काही हरकत असल्यास दि. 5 फेब्रुवारी 2025 पर्यंत कार्यकारी अभियंता, सांगली पाटबंधारे विभाग, सांगली यांच्या कार्यालयास लेखी निवेदन देण्यात यावे. तद्नंतर येणाऱ्या अर्जाचा विचार केला जाणार नाही याची नोंद घ्यावी, असे प्रसिध्दी पत्रकात म्हटले आहे.

 

00000