राष्ट्रीय क्षयरोग दुरीकरण कार्यक्रम क्षयरोग रूग्णांना नि:क्षय पोषण आहार वाटप
ठाणे, प्रतिनिधी:- कल्याण तालुका आरोग्य अधिकारी डॉ.आशा मुंजाळ यांच्या मार्गदर्शनाखाली नि:क्षय पोषण आहार वाटप कार्यक्रम करण्यात आला. या कार्यक्रमाला मुख्य कार्यकारी अधिकारी रोहन घुगे उपस्थित होते. कार्यक्रमाची सुरूवात रोहन घुगे यांच्या हस्ते दीपप्रज्वलनाने करण्यात आली.
यावेळी प्रकल्प संचालक छायादेवी शिसोदे, अंबरनाथ गट विकास अधिकारी श्री. राठोड उपस्थित होते.
मुख्य कार्यकारी अधिकारी रोहन घुगे यांनी स्वत: कल्याण तालुक्यातील एकूण 5 रूग्णांना नि:क्षय मित्र या संकल्पनेतून दत्तक घेतले आहे. मुख्य कार्यकारी अधिकाऱ्यांनी या कृतीतून एक चांगला आदर्श अधिकारी वर्गापुढे ठेवला आहे.
समाजात जास्तीत जास्त लोकप्रतिनिधी व अधिकारी वर्गाने स्वत:हून पुढे येऊन क्षयरूग्णांना निक्षय पोषण आहार माध्यमातून सहकार्य करावे, असे आवाहन मुख्य कार्यकारी अधिकारी रोहन घुगे यांनी केले.
सद्य:स्थितीत कल्याण तालुक्यात एकूण 15 सक्रीय नि:क्षय मित्र कार्यरत आहेत. नि:क्षय मित्र ही संकल्पना क्षयरोगाचे उच्चाटन करण्यासाठी महत्वाची ठरणार आहे, अशी माहिती तालुका आरोग्य अधिकारी डॉ.आशा मुंजाळ यांनी दिली आहे.
00000
