जिजाऊ संस्थेकडून पिवळी केंद्रातील ९ शाळांमधील १,०५० विद्यार्थ्यांना ३,१०० मोफत वह्यांचे वितरण

शहापूर | प्रतिनिधी-विद्यार्थ्यांना शिक्षणासाठी आवश्यक शैक्षणिक साहित्य सहज उपलब्ध व्हावे आणि कोणताही विद्यार्थी आर्थिक अडचणीमुळे शिक्षणापासून वंचित राहू नये, या उदात्त हेतूने जिजाऊ शैक्षणिक व सामाजिक संस्था, महाराष्ट्र संस्थापक अध्यक्ष निलेश सांबरे यांच्या संकल्पनेतून संपूर्ण कोकणात ३५ लाख मोफत वही वाटप अभियान राबविण्यात येत आहे. या अभियानांतर्गत आज शहापूर तालुक्यातील पिवळी केंद्रातील ९ शाळांमध्ये मोफत वही वाटप कार्यक्रम उत्साहपूर्ण वातावरणात संपन्न झाला

या उपक्रमाअंतर्गत खोर, पिवळी, वांद्रे, कोशिंबडे, रताळेपाडा, सावरोली, वेडवहाळ आणि वेहलोंडे येथील जिल्हा परिषद शाळांसह किल्लेमाऊली माध्यमिक शाळेतील एकूण १,०५० विद्यार्थ्यांना सुमारे ३,१०० मोफत वह्यांचे वितरण करण्यात आले. या उपक्रमामुळे विद्यार्थ्यांमध्ये आनंदाचे वातावरण निर्माण झाले असून पालक, शिक्षक आणि ग्रामस्थांनी जिजाऊ संस्थेच्या सामाजिक बांधिलकीचे कौतुक केले

यावेळी जिजाऊ संघटना शहापूर तालुका प्रमुख तथा रत्नागिरी संपर्क प्रमुख दिनेश निमसे, मुंबई म्युनिसिपल बँकेचे संचालक भानुदास भोईर, कुणबी सेनेचे शहापूर तालुका प्रमुख जगन निपुर्ते, जिजाऊ संस्थेचे सुदर्शन पाटील, सुनील निपुर्ते, शिवसेना उपतालुका प्रमुख अमय भाटी, तसेच किशोर धसाडे, विनोद निमसे, यशवंत वाख, आशिष कटारे, रुपेश भोईर आणि जिजाऊ संस्थेचे पदाधिकारी, कार्यकर्ते, शिक्षक व ग्रामस्थ मोठ्या संख्येने उपस्थित होते.

यावेळी मार्गदर्शन करताना दिनेश निमसे म्हणाले, “मा. निलेश सांबरे यांच्या नेतृत्वाखाली जिजाऊ संस्था शिक्षण, आरोग्य आणि सामाजिक क्षेत्रात सातत्याने जनहिताचे उपक्रम राबवत आहे. विद्यार्थ्यांच्या हातात वही देणे म्हणजे त्यांच्या भविष्याला बळ देणे होय. शिक्षण हीच खरी समाजपरिवर्तनाची ताकद असून ग्रामीण भागातील प्रत्येक विद्यार्थ्याला समान संधी मिळावी, यासाठी जिजाऊ संस्था सातत्याने कार्यरत आहे. विद्यार्थ्यांनी मोठी स्वप्ने पाहावीत, जिद्दीने अभ्यास करावा आणि अधिकारी बनून समाजाची सेवा करावी.”