शहापूर येथील पद्मश्री सिंधुताई सपकाळ शासकीय औद्योगिक प्रशिक्षण संस्थेत स्वामी विवेकानंद जयंती दिवस ‘राष्ट्रीय युवा दिन’म्हणून साजरा
ठाणे, प्रतिनिधी):- शहापूर येथील पद्मश्री सिंधुताई सपकाळ शासकीय औद्योगिक प्रशिक्षण संस्थेत रविवार, दि.12 जानेवारी 2025 रोजी स्वामी विवेकानंद यांचा जयंती दिवस ‘राष्ट्रीय युवा दिन’ म्हणून साजरा करण्यात आला.
जिल्ह्यातील विविध युवकांच्या कौशल्यांना व गुणांना वाव मिळावा, प्रोत्साहन मिळावे, यासाठी या संस्थेतून व्यवसाय अभ्यासक्रम उत्तीर्ण झालेल्या व यशस्वी उद्योजक म्हणून नावरुपास आलेल्या माजी प्रशिक्षणार्थ्यांचा मान्यवरांच्या हस्ते गौरव करण्यात आला.
सन 2024-25 मधील संस्थेतील, तंत्रप्रदर्शन, निबंध, वक्तृत्व, वादविवाद, चित्रकला स्पर्धा यामध्ये प्राविण्य मिळविलेल्या प्रशिक्षणार्थ्यांचाही यावेळी गौरव करण्यात आला आहे.
या कार्यक्रमास शहापूर नगरपंचायतच्या नगराध्यक्षा श्रीमती गायत्री भांगरे, संस्थेचे आय.एम.सी. चे सदस्य श्री.संतोष निवळकर, श्री.दिनेश वाघ, संस्थेचे प्राचार्य श्री.रा.अ.हिरे, व्याख्याते श्री.उन्मेश गजरे व श्री.सदानंद जाधव तसेच संस्थेचे सर्व कर्मचारी, संस्थेतील आजी व माजी प्रशिक्षणार्थी, पालक उपस्थित होते.
00000
