बलुचिस्तानमधील स्वातंत्र्य चळवळीच्या पार्श्वभूमीवर आता वझिरिस्तानमध्येही स्वतंत्र राष्ट्रासाठी आंदोलन सुरू…

विदेश प्रतिनिधी -बलुचिस्तानमधील स्वातंत्र्य चळवळीच्या पार्श्वभूमीवर आता वझिरिस्तानमध्येही स्वतंत्र राष्ट्रासाठी आंदोलन सुरू झाले आहे. त्यामुळे पाकिस्तानी सत्ताधाऱ्यांची चिंता आणखी वाढली आहे.

वझिरिस्तानमधील स्थानिक नागरिक आणि युवा वर्ग आता खुलेआम पाकिस्तान सरकारविरोधात आवाज उठवत आहेत. “आम्हाला आमचे स्वतंत्र राष्ट्र हवे आहे” अशा घोषणा देत ते पाकिस्तानी सैन्याच्या उपस्थितीविरोधात निदर्शने करत आहेत. काही ठिकाणी तर पाकिस्तानचा झेंडा उतरवून स्वातंत्र्याचे प्रतीक म्हणून वेगळा झेंडा फडकवण्यात आल्याचेही समोर आले आहे.

आंदोलनामध्ये स्थानिक समाजसुधारक, बुद्धिजीवी वर्ग तसेच महिलांचाही सहभाग दिसून येतो आहे. हे सर्वजण सरकारच्या दडपशाही, सैन्याच्या अत्याचार आणि मूलभूत अधिकारांवरील मर्यादा यांना विरोध करत आहेत. सोशल मीडियावर या आंदोलनाचे व्हिडीओ आणि फोटो मोठ्या प्रमाणावर प्रसारित होत आहेत.

पाकिस्तान सरकारकडून या चळवळीला दहशतवादाशी जोडण्याचा प्रयत्न सुरू असून, अनेक आंदोलकांना अटक करण्यात आली आहे. मात्र दडपशाही वाढल्याने आंदोलन अधिक तीव्र होत असल्याचे चित्र आहे. बलुचिस्तानमध्ये सुरू असलेल्या चळवळीप्रमाणेच वझिरिस्तानमधील हा उद्रेकही आंतरराष्ट्रीय लक्ष वेधू लागला आहे.

विश्लेषकांच्या मते, जर पाकिस्तानने या भागातील जनतेच्या सामाजिक, राजकीय आणि आर्थिक मागण्यांकडे गांभीर्याने लक्ष दिले नाही, तर देशांतर्गत अस्थिरता अधिक तीव्र होण्याची शक्यता आहे. वझिरिस्तानमधील ही उठावाची लाट भविष्यात पाकिस्तानच्या एकात्मतेसाठी मोठे आव्हान ठरू शकते.

00000