‘सेल (CARGO)’ वाहतुकीमुळे रात्रीच्या वेळी वाहतुकीत बदल..
राज्य प्रतिनिधी-रायगड जिल्हा दंडाधिकारी यांनी गेल कंपनी (उसर, ता. अलिबाग) साठी लागणाऱ्या अति-अवजड ‘सेल (CARGO)’ मशिनरीच्या वाहतुकीसाठी महत्त्वपूर्ण वाहतूक बदल जाहीर केले आहेत. प्रीमियर ट्रान्सपोर्ट लिमिटेड कंपनीमार्फत ही वाहतूक दिनांक ११ ऑक्टोबर २०२५ ते १८ ऑक्टोबर २०२५ या आठ दिवसांच्या कालावधीत करण्यात येणार आहे.
रात्री १ ते पहाटे ५ पर्यंत एक लेन बंद: जिल्हाधिकारी कार्यालयाने दिलेल्या माहितीनुसार, नागोठणे-कुडूस-पेझारी-कार्लेखिंड-अलिबाग-कुरुळ-बेलकाडे मार्गे उसर (गेल कंपनी) पर्यंत या सेल (CARGO) ची वाहतूक केली जाईल. या सेलची रुंदी व उंची जास्त असल्यामुळे वाहतूक कोंडी आणि विद्युत पुरवठ्यात अडथळे येण्याची शक्यता आहे. त्यामुळे, रात्री ०१.०० वाजल्यापासून ते सकाळी ०५.०० वाजेपर्यंत या मार्गावरील वाहतूक फक्त एका लेनमधून सुरू ठेवण्याचा आदेश जारी करण्यात आला आहे.
वाहतुकीचा नेमका मार्ग आणि कालावधी:कालावधी: दि. ११/१०/२०२५ ते दि. १८/१०/२०२५वेळ: रात्री ०१.०० ते सकाळी ०५.०० वाजेपर्यंतवाहतूक मार्ग: नागोठणे-कुडूस-पेझारी-कार्लेखिंड-अलिबाग-कुरूळ-बेलकाडेमार्गे उसर (गेल कंपनी)नियंत्रण: या काळात सदर मार्गावरील सर्व प्रकारच्या वाहनांची वाहतूक एक लेनमधून केली जाईल
प्रवाशांना आणि वाहनचालकांना आवाहन:जिल्हाधिकारी आणि पोलीस अधीक्षक कार्यालयाने वाहनचालक आणि नागरिकांना आवाहन केले आहे की, वाहतूक कोंडीचा त्रास टाळण्यासाठी दिलेल्या वेळेत पर्यायी मार्गांचा वापर करावा. तसेच, वाहतूक सुरळीत पार पडावी यासाठी जिल्हा वाहतूक शाखेकडून आवश्यक पोलीस बंदोबस्त तैनात करण्यात येणार आहे. विद्युत पुरवठ्याबाबतही एम.ई.सी.बी. कार्यालयाकडून आवश्यक परवानगी घेण्यात आलेली आहे.
