मुंबईतील सायन हॉस्पिटल चा होणार पुनर्विकास प्रकल्प सुरू

 

मुंबई प्रतिनिधी-

 सायन येथील लोकमान्य टिळक पालिका सर्वसाधारण रुग्णालयाच्या बहुप्रतिक्षित पुनर्विकास प्रकल्पाला अखेर सुरुवात झाली आहे. अनेक वर्षे निविदा प्रक्रियेत आणि तांत्रिक अडचणींमुळे रखडलेला हा महत्त्वाकांक्षी प्रकल्प मार्गी लागल्यामुळे मुंबईकरांना लवकरच अत्याधुनिक आरोग्य सुविधा मिळणार आहेत. पहिल्या टप्प्यात जीर्ण झालेल्या इमारती पाडण्याचे काम प्रत्यक्षात सुरू झाले आहे.

 

प्राप्त माहितीनुसार -सायन रुग्णालयाच्या आवारातील जुन्या आणि जीर्ण झालेल्या इमारती पाडण्याच्या कामाला सुरुवात झाली आहे. यामध्ये प्रामुख्याने नर्सिंग आणि निवासी वैद्यकीय अधिकारी यांच्यासाठी असलेल्या इमारतींचा समावेश आहे. या इमारतींच्या जागी आता नवीन, बहुमजली इमारती उभ्या राहणार आहेत. पाडकामामुळे प्रभावित झालेल्या परिचारिका आणि निवासी अधिकाऱ्यांना सुरक्षेच्या दृष्टिकोनातून रुग्णालयाच्या आवारातील नवीन वसतिगृह इमारतींमध्ये यशस्वीरित्या स्थलांतरित करण्यात आले आहे. रुग्णालय संकुलातील जागा जास्तीत जास्त कार्यक्षमतेने वापरून वैद्यकीय सेवा, शिक्षण आणि निवास सुविधा यांचा दर्जा आंतरराष्ट्रीय मानकांनुसार उंचावणे हा या पुनर्विकासामागचा मुख्य उद्देश आहे.

 मुंबई महापालिकेने सायन रुग्णालयाचा पुनर्विकास करताना भविष्यातील आरोग्य गरजा विचारात घेऊन एक व्यापक आराखडा तयार केला आहे. या पुनर्विकासानंतर सायन रुग्णालयाची क्षमता वाढवून ती एक हजार नऊशे खाटांची केली जाणार आहे. सध्याच्या मुंबईतील सर्वात मोठ्या शासकीय रुग्णालयांपैकी हे एक असेल. याशिवाय पुनर्विकास प्रकल्पात नवीन वैद्यकीय महाविद्यालय इमारत आणि अत्याधुनिक तंत्रज्ञान व उपकरणांनी सुसज्ज असे विभाग उभारले जाणार आहेत.

या महत्त्वाकांक्षी पुनर्विकास प्रकल्पासाठी मुंबई महापालिका सुमारे सातशे सदतीस कोटी रुपये खर्च करणार आहे. या प्रकल्पाचे नियोजन नवी दिल्लीतील अर्कोप आणि शशांक मेहेंदळे अ‍ॅण्ड असोसिएटस या नामांकित कंपन्यांनी केले आहे. सायन रुग्णालयाच्या पुनर्विकासाचा प्रस्ताव अनेक वर्षे तांत्रिक उणिवा आणि निविदा प्रक्रियेतील विलंबामुळे रखडला होता. सप्टेंबर २०१९ मध्ये हा प्रस्ताव स्थायी समितीत तांत्रिक कारणामुळे परत पाठवण्यात आला होता. अखेरीस, नोव्हेंबर २०२० मध्ये मुंबई महापालिकेच्या स्थायी समितीने या प्रस्तावाला मंजुरी दिली आणि पुनर्विकासाचा मार्ग मोकळा झाला. सत्ताधारी आणि विरोधी पक्षांमध्ये काही मतभेद असले तरी, सार्वजनिक आरोग्याच्या गरजेमुळे हा प्रस्ताव एकमताने मंजूर करण्यात आला.

सायन रुग्णालयाच्या पुनर्विकासातून मुंबईतील आरोग्य क्षेत्राला मोठी चालना मिळणार आहे. विशेषतः वैद्यकीय शिक्षण घेणाऱ्या विद्यार्थ्यांना आणि गंभीर आजारांवर उपचार घेणाऱ्या रुग्णांना यामुळे उच्च दर्जाच्या सुविधा उपलब्ध होतील.