बनावट भारतीय चलनी नोटा छापून त्यांचा पुरवठा करणाऱ्या रॅकेटचा दिल्ली पोलिसांनी पर्दाफाश करत चार आरोपींना अटक
नवी दिल्ली प्रतिनिधी-
बनावट भारतीय चलनी नोटा छापून त्यांचा पुरवठा करणाऱ्या रॅकेटचा दिल्ली पोलिसांनी पर्दाफाश करत चार आरोपींना अटक केली आहे.
पश्चिम दिल्लीचे पोलीस उपायुक्त हरेश्वर व्ही. स्वामी यांनी दिलेल्या माहितीनुसार, आरोपींकडून ५०० आणि १०० रुपयांच्या एकूण १८ लाख २३ हजार ८०० रुपयांच्या दर्शनी मूल्याच्या बनावट नोटा जप्त करण्यात आल्या आहेत.
या कारवाईत लॅपटॉप, हार्ड डिस्क, छपाई यंत्रे, स्क्रीन प्रिंटिंग फ्रेम्स तसेच बनावट नोटा तयार करण्यासाठी वापरलेली इतर उपकरणेही जप्त करण्यात आली आहेत.अटक करण्यात आलेल्या आरोपींची नावे अंकित कुमार, गुरदीप सिंह ऊर्फ मन्नी, कुलवंत सिंह ऊर्फ काके आणि अमित अशी आहेत. या प्रकरणाचा पुढील तपास सुरू आहे.
