सहकार विभागातील तक्रारींच्या निराकरणासाठी सहकार संवाद पोर्टल- जिल्हा उपनिबंधक मंगेश सुरवसे

        सांगली, प्रतिनिधी : महाराष्ट्र स्टेट को-ऑपरेटिव्ह हाऊसिंग फेडरेशन लिमिटेडच्या विद्यमाने सहकार संवाद पोर्टल हा उपक्रम सुरू झालेला आहे. सहकार संवाद (https://sahakarsmvadhousingfed.in) हे महाराष्ट्रातील सहकारी गृहनिर्माण संस्थांमधील तक्रारींचे निराकरण करण्यासाठी उपलब्ध करून दिलेले संकेतस्थळ आहे. सहकार विभागातील सर्व तक्रारींचे निराकरण करण्यासाठी जास्तीत जास्त नागरिकांनी सहकार संवाद या पोर्टलचा वापर करावा, असे आवाहन जिल्हा उपनिबंधक मंगेश सुरवसे यांनी प्रसिध्दीपत्रकाव्दारे केले आहे.

  सहकार संवाद पोर्टलद्वारे गृहनिर्माण संस्थेचे सदस्य संस्थेच्या कारभारासंबंधीत तक्रारींची नोंद करू शकतात. महाराष्ट्र शासनाच्या सहकार खात्याचे अधिकारी उपनिबंधक आणि सहाय्यक निबंधक हे, या तक्रारींवर कार्यवाही करतील, अशी सुविधा या संकेतस्थळावर उपलब्ध करून देण्यात आली आहे. तक्रारदारांना आपल्या तक्रारीचे पुढे काय झाले याबाबत संकेतस्थळावर माहिती मिळू शकते. सहकार आयुक्त व निबंधक, सहकारी संस्था, पुणे आणि त्यांचे अधिनस्त संबंधित अधिकाऱ्यांनाही तक्रार निवारण प्रक्रियेचा आढावा घेण्याची सोय या संकेतस्थळावर केलेली आहे. या ऑनलाइन सुविधेमुळे तक्रारदाराचा संबंधित कार्यालयात जाण्या-येण्याचा वेळ आणि खर्चाची बचत होते. अत्यंत माफक मूल्य आकारून ही सेवा दिली जात आहे. या उपक्रमाला उत्तेजन देऊन त्यासंबंधी सहकार विभागातील सर्व तक्रारींचे निराकरण करण्यासाठी जास्तीत जास्त नागरिकांनी सहकार संवाद या पोर्टलचा वापर करावा, असे प्रसिध्दी पत्रकात म्हटले आहे.

00000