मुख्यमंत्री देवेंद्र फडणवीसांना जन्मदिनी रक्तदानातून मानवंदना घनसावंगी विधानसभेत शेकडो कार्यकर्त्यांचे रक्तदान…..
राज्य प्रतिनिधी घनसावंगी : महाराष्ट्राचे मुख्यमंत्री देवेंद्र फडणवीस यांच्या वाढदिवसानिमित्त भारतीय जनता पार्टीचे प्रदेशाध्यक्ष आमदार रवींद्र चव्हाण यांच्या प्रेरणेतून संपूर्ण महाराष्ट्रभर “महा रक्तदानाचा संकल्प” राबविण्यात आला. देवेंद्रजींचा वाढदिवस ‘उत्सव’ म्हणून नव्हे तर ‘उत्तरदायित्व’ म्हणून साजरा करत, घनसावंगी विधानसभा मतदारसंघात समृद्धी साखर कारखान्याचे चेअरमन सतीश घाटगे पाटील यांच्या नेतृत्वाखाली तीनही मंडळात भव्य रक्तदान शिबिरे आयोजित करण्यात आली. या शिबिरात २२८ भाजपा पदाधिकारी, कार्यकर्ते आणि युवकांनी उत्स्फूर्तपणे रक्तदान करत सामाजिक जबाबदारी निभावली.
घनसावंगी तालुक्यात समृद्धी साखर कारखाना येथे भाजपा तालुका अध्यक्ष पुरुषोत्तम उढाण यांनी रक्तदान शिबिराचे आयोजन केले होते. रांजणी (जालना ग्रामीण) येथे मंडळ अध्यक्ष संजय आटोळे यांनी उपक्रम यशस्वीपणे पार पाडला. तर शहागड येथे तालुका प्रमुख शिवाजी मोरे यांच्या वतीने शिबीर घेण्यात आले. या शिबिरास निवडणूक प्रमुख सतीश घाटगे, भाजपा जिल्हाध्यक्ष तथा आमदार नारायण कुचे यांनी भेट दिली. प्रत्येक ठिकाणी रक्तदात्यांचा मान्यवरांच्या हस्ते प्रमाणपत्र देऊन सत्कार करण्यात आला. हा विधायक उपक्रम “सेवा हीच संस्कृती” या भाजपच्या विचारधारेचे जिवंत उदाहरण ठरला आहे. या शिबिरासाठी शहागड घनसावंगी आणि रांजणी मंडळातील भाजपा पदाधिकारी व कार्यकर्त्यांनी परिश्रम घेतले. रक्तसंकलनासाठी जनकल्याण रक्तपेढी व लोकमान्य रक्तपेढीच्या डॉक्टर व कर्मचाऱ्यांनी सहकार्य केले. याबद्दल संपूर्ण टीमचा सतीश घाटगे यांच्या हस्ते सत्कार करण्यात आला.
