अमेरिकेच्या राज्य विभागाने बलुचिस्तान लिबरेशन आर्मी आणि तिच्या सशस्त्र शाखा ‘मजीद ब्रिगेड’ला परकीय दहशतवादी संघटना म्हणून घोषित ..
विदेश प्रतिनिधी-अमेरिकेच्या राज्य विभागाने बलुचिस्तान लिबरेशन आर्मी आणि तिच्या सशस्त्र शाखा ‘मजीद ब्रिगेड’ला परकीय दहशतवादी संघटना म्हणून घोषित केले आहे. याआधी २०१९ मध्ये बलुचिस्तान लिबरेशन आर्मीला दहशतवादी यादीत समाविष्ट करण्यात आले होते, मात्र आता ‘मजीद ब्रिगेड’लाही या यादीत स्थान देण्यात आले आहे.
हा निर्णय पाकिस्तानच्या सेनाप्रमुख जनरल आसिम मुनीर यांच्या अलीकडील अमेरिकन दौऱ्यानंतर घेण्यात आला आहे. या घोषणेचा उद्देश अमेरिका आणि पाकिस्तान यांच्यातील दहशतवादविरोधी सहकार्य अधिक मजबूत करणे हा असल्याचे अधिकाऱ्यांनी सांगितले.बलुचिस्तान लिबरेशन आर्मी आणि मजीद ब्रिगेडवर पाकिस्तानमधील अनेक मोठ्या हल्ल्यांचे आरोप आहेत. २०२४ मध्ये कराची विमानतळ आणि ग्वादर येथील आत्मघाती हल्ल्यांची जबाबदारी या संघटनांनी स्वीकारली होती. तसेच मार्च २०२५ मध्ये ‘जफ्फर एक्स्प्रेस’ ट्रेन हायजॅक करून एकतीस लोकांचा बळी घेतला आणि तीनशे हून अधिक प्रवाशांना ओलीस धरल्याचा गंभीर आरोपही त्यांच्या विरुद्ध आहे.
अमेरिकेच्या मते, या गटांच्या क्रियाकलापांमुळे पाकिस्तानातील सुरक्षेची परिस्थिती अस्थिर झाली आहे आणि प्रदेशातील शांतता धोक्यात आली आहे. या कारवाईनंतर संबंधित गटांचे अमेरिकेतील मालमत्ता व आर्थिक व्यवहार गोठवले जातील आणि अमेरिकन नागरिकांना त्यांच्यासोबत कोणताही व्यवहार करण्यास बंदी असेल.
या निर्णयामुळे बलुचिस्तानमधील उग्रवाद कमी करण्याच्या प्रयत्नांना बळ मिळेल, असा अमेरिकेचा विश्वास आहे. पाकिस्तान सरकारने या निर्णयाचे स्वागत करत अमेरिकेचे आभार मानले असून, दहशतवाद निर्मूलनासाठी दोन्ही देश एकत्र काम करतील, असे स्पष्ट केले आहे.
000000
