कृषि क्षेत्रात कृत्रिम बुध्दिमत्ता वापर प्रोत्साहन योजनेचे अर्ज पंचायत समितीत उपलब्ध    – कृषि विकास अधिकारी मनोजकुमार वेताळ

सांगली, प्रतिनिधी जिल्हा परिषद सांगली कडील कृषि विभागाच्या स्वीय निधी योजनेतून कृषि क्षेत्रात AI (कृत्रिम बुध्दिमत्ता) वापर प्रोत्साहन योजना राबविण्यात येणार आहे. या योजनेच्या अर्जाचा नमुना पंचायत समिती कृषी विभाग येथे उपलब्ध असून जास्तीत जास्त गरजू शेतकऱ्यांनी त्यासाठी अर्ज करावेत, असे आवाहन जिल्हा परिषदेचे कृषि विकास अधिकारी मनोजकुमार वेताळ यांनी प्रसिध्दीपत्रकाव्दारे केले आहे.

       जिल्हा परिषद स्वीय निधी सन-2025-26 मधून कृषि क्षेत्रात AI (कृत्रिम बुध्दिमत्ता) वापर प्रोत्साहन योजनेसाठी रक्कम रुपये 5 हजार किंवा किंमतीच्या 50 टक्के यापैकी जे कमी असेल ते प्रति शेतकरी अनुदान देय राहील. शेतकऱ्यांनी नजीकच्या पंचायत समितीमध्ये विहित नमुन्यातील अर्ज 7/12 उतारा, खातेउतारा, आधार कार्ड आणि अर्जाप्रमाणे इतर कागदपत्रे जोडून आपला अर्ज दि. 1 डिसेंबर 2025 पर्यंत पंचायत समिती कार्यलयामध्ये सादर करावा, असे आवाहनही श्री. वेताळ यांनी केले आहे.

00000