सैनिकी मुलांच्या वसतिगृहातील विविध कंत्राटी पदांसाठी २७ फेब्रुवारीपर्यंत अर्ज करावेत
अहिल्यानगर, प्रतिनिधी – जिल्हा सैनिक कल्याण कार्यालय, अहिल्यानगर यांच्या आधिपत्याखाली असलेल्या सैनिकी मुला-मुलींच्या वसतिगृहासाठी कंत्राटी तत्त्वावर विविध पदे भरण्यात येणार असून पात्र उमेदवारांनी २७ फेब्रुवारी २०२६ पर्यंत अर्ज सादर करण्याचे आवाहन जिल्हा सैनिक कल्याण अधिकारी वि. ल. कोरडे यांनी केले आहे.
वसतिगृहामध्ये निव्वळ तात्पुरत्या स्वरूपात वसतिगृह अधीक्षक, सहायक वसतिगृह अधीक्षक, चौकीदार, स्वयंपाकी, माळी व सफाई कामगार ही पदे भरण्यात येणार आहेत. या पदांसाठी नागरी उमेदवार देखील अर्ज करू शकतात. मात्र, माजी सैनिकांना प्राधान्य देण्यात येईल. उमेदवार निर्व्यसनी असणे आवश्यक आहे. वसतिगृह अधीक्षक व चौकीदार यांचा कामाचा कालावधी २४ तासांचा राहील.
अर्जासोबत सैन्य सेवेतील डिस्चार्ज बुक, माजी सैनिक ओळखपत्र, आधार कार्ड यांच्या छायांकित प्रती जोडणे आवश्यक आहे. उमेदवाराचे वय ४५ वर्षांपेक्षा कमी असावे. विहित मुदतीत प्राप्त झालेल्या अर्जांची छाननी करून पात्र उमेदवारांना मुलाखतीची तारीख कळविण्यात येईल. इच्छुक माजी सैनिक व नागरी उमेदवारांनी या संधीचा लाभ घ्यावा, असेही कळविण्यात आले आहे.
000000
