अवयवदान पंधरवड्यानिमित्त जिल्हा सामान्य रुग्णालयात सामूहिक अवयवदान प्रतिज्ञा
बुलढाणा, प्रतिनिधी : सार्वजनिक आरोग्य विभागाच्या वतीने साजऱ्या करण्यात येत असलेल्या अवयवदान पंधरवडा निमित्त जिल्हा सामान्य रुग्णालय, बुलढाणा येथील नेत्ररोग विभागात अधिकारी व कर्मचाऱ्यांनी सामूहिक अवयवदान प्रतिज्ञा घेत समाजात अवयवदानाबाबत जनजागृतीचा संदेश दिला.
जिल्हा शल्यचिकित्सक डॉ. दत्तात्रय बिराजदार व जिल्हा आरोग्य अधिकारी डॉ रणजीत मंडाले यांच्या मार्गदर्शनानुसार आयोजित कार्यक्रमात अवयवदानाचे सामाजिक महत्त्व, मृत्यूनंतर अवयवदानातून अनेकांना नवजीवन मिळू शकते, तसेच नेत्रदानासह विविध अवयवदानाबाबत नागरिकांमध्ये जागरूकता निर्माण करण्याची गरज यावर मार्गदर्शन करण्यात आले. यानंतर उपस्थित सर्व अधिकारी व कर्मचाऱ्यांनी अवयवदानाची सामूहिक प्रतिज्ञा घेतली.
याप्रसंगी नागरिकांनी अवयवदानाचा संकल्प करून गरजूंना जीवनदान देण्यासाठी पुढाकार घ्यावा, असे आवाहन करण्यात आले. यावेळी कार्यक्रम व्यवस्थापक डॉ. रवी शिंदे, डॉ. भिलावेकर, नोडल अधिकारी अविनाश चिंचोले, जि. वि. मा. अ. धुतडमल, नेत्रदान समुपदेशक योगेश सिरसाट, डॉ. तोडकर, सौरभ हिवाळे, सवडतकर तसेच नेत्ररोग विभागातील अधिकारी व कर्मचारी उपस्थित होते.
